<< Pêşgotin >>

Xwendevan û nivîskarên rêzdar :
 

Arşevê Oskan

Çi kes bin, yan sazî bin.. heger ku bi giraniya barê xwe nezanibin, yan jî sûde ji ezmûneyên xwe hilnegirtibin, bê gumane ku wê li gelek dergehên teng û nependî rastbên, ne mebesta mine.. ku ez pêvajoyê di çavên we de tîr dikim, lê giringe ku kes xwe wek leheng, di sînga wêjeya miletê xwe yê jar û belengaz de nebîne, ev sîng meydana hemû lawên dilsoz.. yên ku vê sîngê ji birînan diparêzin ...
Heger mirov vajî vê rastiyê bibîne, tê wateya ku mirov bi nirx û bedewiya pêvajoyê nizane û nasnake, yan jî pêdiviya qonxê li pîvana mercên guhertinê ronahî nabîne, li vir tiştekî din xwe dide pêş, ku ew mirovana ne ronakbîrin, û taybetiyên rewşa ewarte ya li ser miletê Kurd dane keysa xwe, û destên xwe bi serxweşî li dîwarê dîrokê, bê pesporî xistine û civat bi xwe re tarî hiştine, da ku bejna wanî zirav neyê pêvan....
Li min negrin gelî bira ku min hinekî da nav, lê ji ber ku em nadin nav, emê nikarin jî delav qam bikin .... rewş wisaye, xirecira me li ser pişta vê dayika dil bi kul û westiyayî ji birînên bindestî û serpêhatiyên demê... Rastî hinekî tale, lê carcaran talî dermane. Di ezmûneya govara Zevî de, me gelek serpêhatî û derdên mezin pelandin, hem ji aliyê saziyan û hem ji aliyê ronak-kiwîrên keysebaz, lewra min xwest ez li ser vê xalê çendî rawestin, dibe ku wê hingê, ev çend xal bibin rêbazeke rexneyî, ji bo serastkirina hin ramanên beravêtî û têkeve mijareke taybet di bîreweriya me de... tevî ku rexin li cem me sosrete ne wisa ye !!?? ....
Heger partiyên me bi berhemên xwe tenê dakevin, û ronakbîrên me bi çend hevalan re bêne xêzkirin, mirov matmayî dimîne li xwestekên wanî netewî, ango ew jî dibin mîna êl û komikên sînorkirî, di berjewndî û navtêdanan de, ev kar jî xetereke mezin li ser me dihêle, lê ya ku hêvî û baweriyên me li ser lingan disekinîne, dîsa hebûn û afrandia nifşekî bedew ji keç û xortane, yên ku em roj bi roj dibînin û dibihîzin, ku zemînek ji xwe re raxistine, bi mejîkî vejandî û hêzeke sazkirî li pêlan siwar dibin û qonaxên kilasîkiyetê derbas dikin ...
Em jî bi zimanekî serbest ji wana re dibêjin, zeviyên me bi pênûsên we dixemilin, bi xêr bên nav Zeviya xweyî bendewar, seyrana zindîbûnê bigerînin, kulîlkên wê bi pênûsên xwe avdin û bê minet wan bînbikin.. pê re hêvî bi we re digirnije ...

Têbinî: (Di helkeftina weşana (10) hijmaran ji govara Zevî, me xwest em pirsekê ji we bikin û di hijmara (11) an de, bersiva we, di beşekî taybet de biweşînin, pirsa me jî eve: “Nerîna we li ser Govara Zevî di derbarê naverok û kêsim de”. Bila ne pêhtirî du rûpelan be,Hûnê ji kerema xwe li ser vê êmêlê rêkin: zevi@amude.com ......... zor sipas) .

12 / 12 / 2003 .