YARA BERÎ QEHWÊ, BERÎ GÎHÊ, BERÎ NIMÊJÊ, BERÎ SÊVAN
Û BERÎ FERHENGÊ[i]

Hoşeng Broka

Efrin.net 26. 07. 2005

Destpêka sêvan e
Navê hatina Te

Destpêka hîro û yasmînan e
Pencereya ji pêjna
Endekoya
Sînga Te


Destpêka gulgeniman e
Demsala ji wexta
Destên Te

Destpêka naqosê ye
Wexta sînfoniya derengî
Laşê Te

Destpêka baranê ye
A
Navbera
Cotkê
Memikên Te

Destpêka sûlavê ye
Ko xwe davêje hemêza
Herdu destên min
Yên ji bîra
-Darên herherê-
Yê ji-vodkayê- heta bi –vodkayê-
Dîn û dîîîîîîîîn
Porê Te


Destpêka gezo ye
Gezooooo
Çinîna şekir
Ji lêvên Te


Destpêka – Sîpanê Xelatê- ye
Ko ji kovîtiyê diçe kovîtiyê
Rabûna navê Te

Destpêka xecxecokan e
Çaxê kamilbûna
Birîna Te


Destpêka kewan e
Kewaaaaan
Xwîna Te


Destpêka hechecîkan e
Koçkirina aliyan ji tiştên Te


Destpêka bêrîkirinê ye
Çîvçîva çûkan
Wexta sîng û berên Te

Destpêka kathejmêrê ye
Ko ji bendemanê diçe bendemanê
Derengî navê Te

Destpêka peyivînê ye
Hezkirina ji Te


Destpêka meyê ye
Meyêêêê
Ko ji noşê diçe noşê
Navê tazîbûna Te
Ûûûû.......destpêka azadiyê ye
Azaaaaadiyê
Razana hemêza Te
A germ
Û germ
Hey yara berî qehwê
Berî gîhê
Berî nimêjê
Berî sêvan
Û berî ferhengê
– De were!
Û bi hatina Xwe
A zû re
Tam bi qasî navên Xwedê
Ne kêm ne jî zêde
Hezar nêrgiz
Û nêrgizekê
Di xwîna min
Ya wek Te
Zû
De vêxe!!

 
  JI HELBESTPIRTÛKA WÎ YA BI NAVÊ- YA JI SÊVAN Û WÊDETIR- WEŞANÊN PÊRÎ ÇAPA YEKEM 2005, HATIYE BIJARTIN.
- BIJARTIN: EBDULREHMAN EFÎF