WÊ ÇILO NALET LI AMÛDÊ BANIYA Û LI XWE...??
 

FANTAZYA(2)

EBDULREHMAN EFÎF

Efrin.net 03. 07. 2005

Li ber vê birca zer: gulê sor bi ser şibakan ve diherikin, li wir, di qorzîkê de, rihek heye ban min dike û min nasdike- erê ez im!! Ew rihê reyhanekê ye an yê kulîlkek pirtiqalî ye.
- Ma te dev ji insanan qeriyaye û tu hatiye cem me kulîlkan?
- Destê min xwîna kesk ji wan tê û çavên min du bask in!
Keçikek rûspî û sor. Kulîlkkeçikek li ser cadê di ber min re dire û dîsa ez dînbûme. Dîno: bi ku de!! Ezê herim pûş!! Kîjan pûş dîno? Ewê li nêzîk hespekî, li çolê!! Çola kê? Çola şoqilan? Ew ne li vê dinyayê ye!! Ez helbestvan û dîn im û ezê ji xwe re bilûrekê ji pellên rîhanê çêbikim û bidim ser rê, ezê herim cem bîrên gundan, ewên kevnar û bi bilûra xwe ezê li ser kevirekî rûnêm û bîst şevan lêxim ta nasbikim: Ez çi me! Û bîr çi ye!

Erka ê helbestvan ko helbestan binivîse ne sloganan!!. Erka yê helbestvan ko bêdeng jî bimîne, ger bixwaze wek tehtekî mezin, wek kevirekî biçûk. Û ger helbesta wî bê fantazî be, divê wê bavêje çem: çemê Xenzîr li Amûdê!! Hin helbestvanên kurd li Ewropayê ne, ma ew jî divê herin Amûdê û helbestên xwe bavêjin çemê Xenzîr!! – Erê , da ew şînbên û bibin strî...û helbestvan jî xwe di çemê bêav de xwe mirêkbikin û hevokên xwe zuhabikin!!

Erka yê helbestvan ko li mala xwe rûnenê, derkeve bi çolan keve..Bi cadan keve, bi sînoran keve!!- Helbestvan giş ne Rimbaud ne!! – Helbestvan giş divê Rimbaud bin!!. Helbesvan giş divê li keştiyên mest, yên fantaziya xwe siwarbin û di çemê Amûdê de, yê bêav, bixeriqin!!

Pirs: ger Arthur Rimbaud li Amûdê ji dayikbûba, wê çilo ji Amûdê bifilitiya!!! Wê çilo nalet li Amûdê baniya û li xwe?? – Wê sola xwe têxista nigên xwe û wê biçiwa xwe li bombên sînorê Tirkiyê bixista; - Ma ne Kurdistan yek e!! Ma ne Kurdistan di fantaziyê de ye!!?? Kurdistan çi ye?? Windabûn û xerîbî ye- êş e û hiriya fantaziyê ye; hinarên wê bombe ne!! Kurdistan: cihê kurdan, yê ne yê wan!!

Birca te qala wê kir zer bû, an belek bû? – ew birceke li Hannoverê ye, duh bi piskilêt di ber re çûm. Hannover bûye cinnetek vê hevînê û birc xwedayek pîrek, nîvtazî e. Lê baskê min li bin guhê xerîbiyê û xemgîniyê dikeve. Te got, tu kulîlk î?!! Na, ez çûk im!! Te got, birc zer e!! Na ew di fantaziyê de belek e û li ser ez hecehecîk im û difirrim cihê kurdan, yê ne yê wan....!!!