Musteşarê Nêçîrvan Barzanî yê rewşenbîrî Bedran Hebîb li Bonnê hevdîtinek ligel

rewşenbîr û nivîskarên Kurd pêk anî

Bonn-AVESTA/ Efrin.net 21. 08. 2005

Musteşarê serokê hikûmeta Kurdistanê yê rewşenbîrî û Berpirsiyarê Dezgeha ARAS Bedran Hebîb li Almanya bajarê Bonnê hevdîtineke berfereh ligel rewşenbîr û nivîskarên Kurd pêk anî.

Di vê hevdîtinê de Bedran Hebîb bi dorferehî li ser rewşa Kurdistanê rawestiya û diyar kir ku li wir bingeha dewleteke kurdî tê danîn, Bedran Hebîb got: "Gelek pirsgirêkên me hene, weke Destûr, Kerkûk û sînorê Kurdistanê… lê belê tevî hemû pirsgirêkên jî, em li wir ji bo hemû gelê Kurd di avakirina Kurdistanê de dixebitin… ew der ne tenê ji bo gelêbaşûre, ew ji bo tevayî gelê Kurdistanê ye, cihê her Kurdekî li wir heye, mafê her Kurdekî di wê Kurdistanê de heye…”

Bedran Hebîb di axaftina xwe de ragihand ku, di pêşerojê de gelek projeyên wan yên cuda hene, di warê medyayê de, û ji beşdaran xwest di van projeyan de cih bigirin û bibin alîkar.
 

Li aliyê xwe ve rewşenbîr, nivîskar û siyasetvanên beşdar kêfxweşiya xwe ji bo tiştekî wiha anîn ziman, û gotin ku ev cara yekemîne ku berpirsiyarek berî pêkanîna projeyekê bi ronakbîran re hevdîtinekê pêk tîne û nêrîn û alîkariya wan dixwaze.
 

Beşdaran, bal kişandin ser wê yekê ku, heya niha hikûmeta herêma başûrê Kurdistanê pêwîtîya tê xwestin nedaye potansiyela rewşenbîr ya li diaspora heye, ev jî weke kêmasiyekê hate dîtin.

Di dawiya hevdîtina bi xwarin û vexwarin de, Bedran Hebîb rewşenbîr vexwendî Kurdistanê kirin.

Kesên weke Metin Incesu, Yaşar Kaya, Nejdet Buldan, Akif Hasan, Mehmut Kilinç, Ahmet Baraçkiliç, Selahettîn Çelik, Ayhan Çiftçi, Şukru Gulmuş, Ahmet Zeki Okçuoglu, Bekir Saydam, Zeki Ozturk, Murat Dagdelen, Seyidxan Kurij, Hunermend Birîndar, Fadil Ozçelik, Dilbixwîn Dara, Emin Husein, Xalid Şahin, û gelek ronakbîr û rojnamevan û nivîskarên din ku piraniya wan ji bakurê Kurdistanê bûn, û di warê medyayê de xwedan tecrûbe bûn, beşdar bûn.

Hevdîtinê heya derengê şevê berdewam kir.