Xeyredîn Murad: Mesûd Barzanî piştgirîyeke mezine bo miletê me

li Kurdistana Sûrîyayê

Mihemed Brîmko/Hewlêr

PNA- Efrin.net 21. 07. 2005

Di semînareke Sîyasî de bi navnîşana (Têkelîyê Kurd û Ereb, Sûrîya weke nimûne) berêz Xeyredîn Murad sikirtêrê giştî ya partîya Azadî ya Kurd li Sûrîyayê, li Kombenda Kawa ya Rewşenbîrî li Hewlêrê berêz gelek xalên sîyasî ronkirin.

Ev roj çawerşemê li katijamêr 6.30 bi beşdarîyeke ji rewşenbîr, sîyasetmedar, rojnamevan û camewer li baxça Kombenda Kawa ya rewşenbîrî û li dirêjahîya çalakîyên Kombendê yên çandî û sîyasî, semînarek bi navê (Têkelîyê Kurd û Ereb, Sûrîya weke nimûne) ji alîyê berêz Xeyredîn Murad sikirtêrê giştî ya partîya Azadî ya Kurd li Sûrîyayê ve hate pêşkêşkirin, li dirêjahîya semînarê berêz Xeyredîn ronahî da li ser gelek xalên girîng li rojavayî Kurdistan û herweha têkelîyê Kurdan û Ereban li ser pêkanîna Demokratîyê li Sûrîyayê, di axaftina xwe de ji bo têkelîyên tevgera Kurdî li gel deselata Sûrî berêz Murad weha got: “Tevgera Sîyasî ya Kurdî gelek pêkol kirine, daku bikaribe têkelîyan di nêvbera xwe û deselata Sûrî de bike ji bo dîdareke sîyasî pêk bînin, lê ta niha deselatê bi ti awayê rê nedaye ji bo guftûgoyeke weha lewra jî Kurd neçarbûn ku xebata xwe ya aştîyane û demokratî bikin di riya şêweyê pirotistoyê re dest pê bike û xurt bike, di van çend salên dawî de jî Kurdan neçarbûn bi awayeke rastîyane xebata xwe bikin û çalakîyên xwe bêtir bikin”

Berêz nîşan da li ser pêşveçûnên rewşa sîyasî ya Kurdî li Sûrîyayê û bandorên pozîtîvî û got: “Ev guhartinên nêvdewletî û herêmî û herweha rewşa pozotîv li Kurdistana Îraqê peydabûye û pêkanîna demokratîyê li Îraqê bi giştî, ev bi giştî nûrmale ku bandorên wê pozotî li ser xebata gelê Kurd li Kurdistana Sûrîyayê de hebe.”

Herweha got: “Hilbijartina Serok Mesûd Barzanî jî piştgirîyeke mezine bo miletê me li Kurdistana Sûrîyayê û bawarîya wan jî bi hêztir dike ji bo xebatê”

Berêz gotinên xwe berdewam kirin û sebaret bi têkelîyên Kurdî û Erebî li gel opozesyona Sûrî weha axivî: “Di despêka têkelîyên me li gel opezisyona Sûrî me çalakîyên baş bi hev re kirin weke xwepşandanên şamê û hevdîtinên berdewam û di 17/Çele/2005 a me rêkeftinek sîyasaî bi hev re navişkir, ji 8 xalan pêkhat ji wan xala 2 sebaret bi doza Kurdî bûn ... lê mixabin weku xuyayê alîyê demokratî li ba biraderên me yên Ereb ne gelkî girînge qasî nerînên wan yên netewayetî bilinde û alîyê şovînî jî girîngtire ji demokratîyê... niha jî têkelîyên me û Ereban bi rastî hatine hejandin lê emê her berdewam bin bo vekirina têkelîyan li ser bingeheke demokratîk”

Berêz Xeyredîn Murad nşîan da ser mafên gelê Kurd yên Niştimanî li Sûrîyayê û herweha mafên Netewî û taybetmendîyên wê û got: “Herweha em weke Kurd û xelkên din di civaka Sûrîyayê de bi hev re hevpişkin û em têkelîyên xwe yên niştimanî di hundir Sûrîyayê de têk nadin, lê em ji bîr nakin jî ku em Netewekin û taybetmendîyên me yên milî hene û mafên me yên netewî hene û herweha em bebşekin ji Kurdistana ku di nêvbera çar dewletan de hatîye parvekirin ji ber vê du erkên me hene; yek ji alîyê netewî û yê din ji alîyê niştimanî”

Ji bo berdewamîya têkelîyên Kurdî- Kurdî û Kurdî- Erebî berêz weha got: “Me komîteyek hevbeş li ser asta sekirtêrên partîyan avakirîye ji bo rêvebirina karê rojane û ev komît ji partîyên Hevbendî û Bera demokrat li Sûrîyayê pêk tê û ez bawerim berî sê rojan civînek wan hebû û di encamê de xalek di daxuyanê de hatibû ku bêtir bikaribin têkelîyan xwe bi alîyên Ereb re bi hêztir bikin”