DEWLETA TIRK DEST BI ÇERXÊ KIR
Efrin.net 04.07.2005
Çapemeniya Tirk bi taybetî jî çapemeniya Medya Doğan di 08.06.2005an
de bi sernûçan guhertinên di belgeya siyasî ya sekretariya Konseya
Ewlekariya Netewî li Tirkiyê wiha dinivîsîne:
Siyaset Belgesi’nde Kürt devleti savaş gerekçesi değil (Di belgeya
siyasetê de dewleta Kurdî nabe biryara şer)
Belgeya siyasetê ya ewlekariya Netewî li Tirkiyê wek zagona bingehîn
ya dewleta nehênî-kûr tê hesibandin ku dewlet li gorî vê belgeyê
siyaseta xwe dimeşîne. Ji birêvebirina zagonsazî bigire heta dadê û hemû
dezgehên dewletê li gorî vê belgeyê têne amade kirin. Dewleta Tirk
dixwaze li gorî vê belgeya siysî, siyaset û stratejiya xwe nû bike û di
gellek mijaran de termînolojiyan jî diguherîne. Belgeya siyasetê bi gorî
nêrîna kesên endamên Konseya Ewlekariya Netewî(MGK) (ji leşker û sivîlan)
tê amade kirin, paşê sekretariya Konseya Ewlekariya Netewî gelalek ji bo
civîna Konseya Ewlekariya Netewî pêşniyar dike. Gava belgeya siyasî di
civîna Konseya Ewlekariya Netewî de hate pejirandin, di pê re jî di
civata wezîran de derbas dibe û dibe biryar, zagon(yasa).
Li gorî daxuyaniyan, divêt ev Belgeya siyasî di roja 21.06.2005an de
bihata rojeva Konseya Ewlekariya Netewî(MGK) û wek biryar di civînê de
derbas biba. Lê - ji ber sedemên ne diyar - ev mijara ji bo demek din,
ku nehate tespîtkirin hate paşvexistin. Tiştê balkêş ew bû, ku
çapemeniya Tirk di pê civîna Konseya Ewlekariya Netewî de ji bilî nûçên
kin zêde li ser ne sekinî, ka gelo çima mijara Belgeya siyaseta dewletê
hate paşvexistin. Ez bawer im, wisa têye xuyakirin, dewlet hê jî di vê
mijarê de nêrîna xwe zelal nekiriye, loma ev mijar paşve xistin.
Wek tê zanîn, heta doh ne pêr, damezirandina dewleta Kurdî ji bo Tirkan
xeta sor bû. Ji roja hebûna dewleta Tirkan heta niha di hemû biryar û
daxuyaniyên dewleta Tirk de di pirsa çareserkirina Kurd û Kurdistanê de
dewleta Kurdî biryara şer bû û dewletê di her derfetê de Kurd tehdît
dikir. Bê guman helwesta dewleta Tirk hê jî nehatiye guhertin, loma
mirov nikare bêje, dewleta Tirk êdî Kurdan tehdît nake û her tişt bûye
gul û gulistan.
Lê pêvajoyên nû li Rojhilata Navîn û guhertinên dinyayê xewn û xeyalên
Tirkan tevlihev kirine û revandine. Loma Tirk mecbûr mane, ku dest bi
çerxê bikin ku bi tewrekî din siyaseta xwe bidomînin.
Divêt em qebûl bikin, dewleta Tirk ne ji ber ku dixweze xwe bi rengekî
pozîtîv biguhrîne, nexêr, li cihê xwe ye, ku mirov bêje, dewleta Tirk di
tengasiyê de ye, neçar e di siyaseta xwe de guhertinan çê bike. Çimkî
dewleta Tirk baş dizane, êdî nikare bi siyaset û quweta xwe pêşî li
dewleta Kurdî bigire.
Guhertinên di demên pêş de di siyaseta Tirkan de bibin, ji niha ve hin
nîşanan dide, ku Amerîka giranahiya xwe pir zêde daye ser wan, ku ew
nikarin êdî xwe tev bidin. Jixwe serdana wezîra karê derve ya Amerîka
birêz Xanima Condoleezza Rice berya ku here Bexdayê di 15.05.2005an de
li Hewlêrê bi serokê Kurdistanê birêz Mesûd Barzanî re peyamê(mesaj)
dide Tirkan, ku ew mecbûr in di siyaseta xwe de, dermafên Kurdan de
guhertinan çêbikin.
Hêjayî gotinê ye, ku yên dewleta Tirk li Rojhilata Navîn bi çek, sîlah,
tang, top, balafir û teyarên herî moderin (yên şer) mûr kir, kire rawil,
cinawir û di berî xelkê da dewleta Amîrîka bixwe ye. Û yê ku dikare
pêşiya vî cinawirî bigire dîsa Amerîka bixwe ye. Hingiya şerê Talîbanan
li Afganistan û şerê Sadam li Iraqê berdevkên Amerîka bi taybetî jî
serokê Amerîka George W. Bush gotina demokrasiyê û Azadiyê ji nav lêvên
xwe dernaxin û her carê bangî gelan û hindikayiyan dikin û dibêjin, ku
kî li dijî rejimên dîktator derê, demokrasî û azadiyê bixweze, em bi wan
re ne. Hêvîdar im Amerîka ji vî helwesta xwe şûnde venegere û alîkariya
me Kurdan bike, ku em cinawirên din jî, rejima Îranê, ya Sûriyê û ya
Tirkiyê jî ji holê rakin.
Belê çerx êdî hatiye gerandin. Tirk dê yan emrê xwe bi qaşo siyaseta xwe
ya nû hinekî dîsa dirêj bikin, yan jî dê di demeke kin de serhev têk
herin. Êdî ew dizanin!!!!!
|
