Mesûd Barzanî:

Kerkûk hê jî dilê Kurdistanê ye
Emê ji bo Kerkûkê şerî bikin

efrin.net, 12.10.04

ENQERE, KK, AFP – Di çarçewa gera xwe ya welatên derve de Serokê Partiya Demokrat ya Kurdistanê kek Mesûd Barzanî, û piştî ku çû bû Almaniyayê û li gel berpirsiyarên dewleta alman û sîyasetvanên cuda hevdîtin pêk anî bûn, duh li ser vexwendina fermî (resmî) ya dewleta Tirkîyeyê ji bo hevdîtinên ligel berpirsîyarên dewleta tirk çû Enqereyê. (Wêne: Mesûd Barzanî)

Hîn li balafirgehê kek Mesûd Barzanî hevdîtineke kurt ligel serokwezîrê Tirkîyeyê Recep Tayip Erdogan û wezîrê karûbarên derve Abdullah Gul pêk anî. Piştî wê hevdîtinê, li ser pirseke rojnamevanan ya di warê Kerkûkê de, Barzanî bi aşkereyî got ko Kerkûk hê jî dilê Kurdistanê ye.

Dêmek kurdistaniyeta Kerkûkê bi dem û cî ve ne girêdayî ye – ew li her demê û li her derê dilê Kurdistanê ye.

Belê, serokê Partiya Demokrat ya Kurdistanê Mesûd Barzanî dilê Tirkan rehet ne kir û li Enqereyê her çi gava pirsa Kerkûkê jê dihat kirin, wî digot nasnameya Kerkûkê kurdistaniyeta wê ye, Kerkûk bajarekî kurdî ye û kurd dê ji bo Kerkûkê şerî bikin.

Mesûd Barzanî berî ku ji Enqereyê jî biçe li balafirxaneya Esenbogayê bersiva rojnamevanan da û got ku ew fêm nake çima Tirk vê meseleyê ewqas mezin dikin ji ber Kerkûk bajarekî Kurdistanê ye.

Medyaya tirkan kirin û ne kirin nikarîn gotineke wisa ji Mesûd Barzanî wergirin, da ku ji wan re bibe buhane û ew bibêjin va ye Mesûd Barzanî dest ji Kerkûkê berda yan jî ji gefûgurên Tirkan tirsiya û gav paş de avêt. Li Esenbogayê dema ku Mesûd Barzanî got Kekûk bajarekê Iraqê ye û nasnameya wî kurdistaniyeta wî bajarî ye medyaya Tirkan ev wekî nermbûnekê hesibandin, lê belê her li Esenbogayê Mesûd Barzanî bo ajansa AFP-ê got:
– Her kî be û her kîjan rejîm û sîstem be heger ew bixwaze di siyaseta erebkirin yan zorlêkirina xelkê Kerkûkê de berdewamiyê bike, hingê emê mafê xelkê Kerkûkê biparêzin û em amade ne ji bo xelkê Kerkûkê şerî bikin.
Mesûd Barzanî got ew dê ne tenê mafê kurdan li Kerkûkê lê belê mafê hemî grupên ku li Kerkûkê dijîn biparêzin.

Serokwezîrê Tirkiyeyê Recep Tayip Erdogan jî dibêje ew alîgirên wê yekê ne ku problema Kerkûkê li gor qanûna bingehî ya demkî ya Iraqê bête çareserkirin, û Tirkiye wekî prensîp ne li dijî referandumekê ye li Kerkûkê.

Kurdan jî heta niho her heman tişt gotine û dibêjin bila Kurdên ji Kerkûkê hatine derxistin vegerin ser malên xwe, ereb derkevin û bila paşê referandumek çê bibe.

Ya rast ew e ku mirov bibêje problemeke mezin di navbera Kurdan û hikûmeta AKP-ê de li ser meseleya Kerkûkê nîne ji ber hikûmeta AKP-ê kurdistaniyeta Kerkûkê qebûl kiriye û Mesûd Barzanî jî dibêje hevdîtinên wan û hikûmeta Tirkiyeyê erênî bûn, û ew fêm nake çima medyaya Tirkan ewqas negatîv li meseleyê dinêre.

Mesaja Mesûd Barzanî li Tirkîyeyê zelal bû – Kerkûk bajarekî kurdan e

Mesûd Barzanî bi vê çûna xwe ya Tirkiyê û bi axaftinên xwe yên li Tirkîyeyê jî nîşan da ku ew ne serokekî weha ye, ku li deverekê tiştekî bibêje û li devereke din berevajîya wê bibêje. Mesûd Barzanî di axaftinên xwe de mesajên xwe û hizrên xwe bi awayekî pir zelal dan xuyakirin û di warê pirsa Kerkûkê de got:
– Fikrên min ên ji bo Kerkûkê zelal in. Min berê çi goti be, ez niha jî wê fikrê diparêzim. Kerkûk bajarekî Kurdan e.

Mesûd Barzanî di hevdîtinên xwe yên li gel berpirsîyarên Tirkiyê yên cuda de li ser gelek pirsan peyivî û fikrên Kurdan pêşkêşî wan kirin. Li gora ragihandina berpirsiyarê Partiya Demokrat ya Kurdistanê Sefîn Dizeyî pirsên ku di hevdîtinan de hati bûn rojevê bêtir li ser daxwaza Tirkiyê ya vekirina deriyekî duyem, çû-hatina balafiran bo Hewlêrê û pirsa Kerkûkê bûn.
Li gora Dizeyî helwesta Kurdan ya li ser van pirsan weha bûn:

• Pirsa daxwaza Tirkîyeyê ya vekirina derîyê duyem: Li gora Kurdan deriyê heyî deriyekî pir modern e û loma jî pêwîstî bi tu deriyên din tune ye.

• Pirsa çûn-hatina balafiran: Kurd dixwazin ligel Tirkîyeyê pireyeke ezmanî çê bikin. Kurdan ji bo vê yekê hewil da, lê heta niha jî tu bersiv ne hatiye dayîn. Ewropa korîdora xwe ya ezmanî vekir, da balafir biçin Kurdistanê û xwe li paytextê wê Hewlêrê binin. Ev tê wê wateyê ku di navbera Hewlêr û Ewropayê de dê çû-hatina balafiran pêk bên û eger Tirkiyê korîdora xwe ya ezmanî veneke, hingê alternatîfa Kurdan ew e ku çû-hatina “Hewlêr-Ewropa” di ser Urdunê re bikin.

• Pirsa Kerkûkê: Li Kerkûkê qanûnên Iraqê çi bibêjin, ewê pêk bê. Xelkê Kerkûkê yê berê dê vegere. Referandûm dê çê bibe. Piraniya xelkê wê derê çi bixwaze, ewê bê kirin.