Piştî PWD

PYD jî ji Kongra Gel cuda dibe

efrin.net, 23.08.2004

Li gor nûçeyeke AVESTA serokê Partiya Yekîtiya Demokrat (PYD) rêzdar Kemal Şahîn, ku ji bajarê Efrînê ye, ligel 17 endamên encûmena partiyê ji Kongra Gel cuda bûn.

Ji aliyekî din ve malpera amude.com jî berî sê rojan (20.08.2004) li ser navê “Komîteya Amadekar ya Kongra Partiya Yekîtiya Demokrat” daxuyaniyek dabû weşandin. Di wê daxuyaniyê de PYD êrîşî Kongra-Gel dike û wê weke rêxistineke "dûrî şaristaniya demokratane" bi nav dike. Lewre jî ew endametiya xwe di Kongra-Gel de radiwestîne. Herweha ligor heman daxuyaniyê PYD dê di hundir du mehan de kongreyeke awarte li dar xîne, da ku li ser hin xalên girîn û stratêjiya pêşerojê bêne destnîşankirin. Daxuyaniya navborî de PYD sedema birayra cudabûna xwe ji Kongra Gel bi vî rengî eşkere dike: “Da ku em kiryarên destberdana (mosewemê) ji doza gelê me li vî beşî rawestînin û bervedêriya ‘rêbaza serok Apo’ bikin.” Herweha daxuyanî dide xuyakirin ku PYD li ser “berdewamkirin û pêşxistina xebatê sûr e.” Li dawiya daxuyaniyê jî dîsan hatiye aşkerekirin ku PYD dê berê xwe bide “çareserkirina pirsa kurd li Sûriyê bi şêweyên demokrat”.

Hêjayî gotinê ye ku ev biryara ha, weke daxuyanî dide xuyakirin, di civîneke awarte de, ku tê de piraniya endamên encûmena partiyê amade bû bûn, hatiye wergirtin.

Weke tête zanîn berî demkê jî (2.-5. Tebaxê) 40 kadro û berpirsiyarên li pêş di Kongra Gel de, di nav wan de Osman Ocalan jî, konferansek li dar xisti bûn û cihêbûna xwe ji Kongra Gel anî bûn zimên. Wan jî biryar wergirti bû ku ji wir û pê ve bi navê Partiya Welatparêz ya Demokrat (PWD) xebata xwe berdewam bikin.

PWD jî rexneyan li Kongra Gel digire û weha dibêje: “Tevgera gelê kurd ya azadiyê xwediyê mîrasekî 30 salên têkoşînê ye, wê di dîroka netewa kurd de roleke dîrokî lîst… Çi mixabin PKK nikari bû derbasî merheleya demokratîkbûnê bibe û çareyekê ji pirsgirêka kurd re bibîne... Îro tevgera azadiyê xwe bi navê Kongra Gel bi nav kiriye, ji ber ku di nava xwe de nikare demokratîkbûnê çê bike, ew li hember çareyên demokratîk jî dibe kelem…

PWD, di daxuyaniya avakirinê de wiha dinivisîne: PWD di dema avakirinê de ye, ewê di meha Îlonê de bi awayekî fermî bête avakirin.

PWD diyar dike ku ew xebata ji bo azadkirina Abdullah Ocalan karekî mirovanedibîne û qîmetê dide ramanên wî, lê belê ew (PWD) siyaseta xwe serbixwe dimeşîne.

PWD ji bo Tirkiyê demokrasiyê û çareseriyeke demokratî ji bo pirsa Kurdî dixwaze. Herweha ew piştgirya hebûna Dewleta Kurd ya Federe li Başûrê Kurdistanê dike û dibêje ku hebûna wê hêzeke ji bo çareserkirina pirsgirêka kurdî û divê piştgiriya wê bête kirin. PWD bi hezên din yên Kurdistanî re jî dixweye têkiliyên dostaniyê dîne.

Daxuyaniya PYD bi erebî >>>
Daxuyaniya Osman Ocalanî bi kurdî >>>