TRT roja 9-ê Pûşperê yekem bernameya kurdî diweşîne

efrin.net, 05.06.2004

ENQERE (ROJEV) – Di encama têkoşîna gelê kurd a bi gelek bedelên giran hate dayîn de, dewleta tirk hate vê astê ku di televîzyona xwe ya fermî de weşana bi kurdî bike. Rêvebirê Giştî yê TRT-ê Şenol Demîroz diyar kir ku TRT dê roja 7-ê Pûşperê dest bi weşana bi zimanên zikmakî bike. TRT dê roja 7-ê Pûşperê pêşî bi zimanê boşnakî dest bi weşanê bike. Yekem weşana bi zimanê kurdî jî roja -ê Pûşperê ye.

Têkoşîna gelê kurd a azadiyê her roj berhemeke xwe dide. Ligel hemû hewldanên hêzên ku Kurdan înkar dikin, Tirkiye mecbûr ma ku gelê kurd nas bike û çand û hunera wî qebûl bike. Ji gavên ku hatin avêtin yek jî weşana bi zimanê zikmakî ye. Her çiqas rêveberên TRT-ê navên Kurdan hilnadin ser zimanên xwe jî û li dewsa bêjin "kurdî" dibêjin "kirmancça" û "zazakî" jî ev gav ji bo gelê kurd gavek dîrokî ye.

Di dîroka komara Tirkiyeyê de dê cara yekem di televîzyona dewleta tirk de bi zimanê kurdî bername bê weşandin. Gava ku TRT davêje gaveke pir biçûk e. Li aliyê din hîn nayê diyarkirin ku ka dê naveroka bernameyan çawa be. Lê ligel her tiştî, bi zimanê kurdî bername weşandina TRT-ê gaveke girîng û dîrokî ye. TRT dê bi saya têkoşîna gelê kurd bi zimanên kêmenetewên din jî weşanê bike. Li gor daxuyaniya Demîroz, TRT dê rojên yekşeman bi boşnakî, sêşeman bi erebî, çarşeman bi kurmancî, pêncşeman bi çerkezî û roja înê jî bi zazakî weşana xwe bike. Dema weşanê 45 deqe be. Demîroz diyar kir ku di bernameyan de dê nûçeyên navxweyî û navneteweyî û sporê, belgefîlmên cûr bi cûr, magazîn û muzîk bên dayîn.

Weşan dê her roj saet di 10.30 de bê kirin. Li gorî daxuyaniya Demîroz weşan dê di TRT-3 û Radyo-1 ê de bê kirin.

Belê ev gava li gelê kurd pîroz be...