Li Bonn, Zürich, Göteborg û Kopenhagen-ê konsêrtên piştgiriyê

efrin.net, 10.05.2004

Ji rûreşkirina plan û êrîşên hov û dirinde yên li dijî gelê me li Başûr rojavayê Kurdistanê û bona piştgirî û alîkariya berxwedan û lixwexwedîderketina gelê me revenda kurd li Ewropa bi dehan çalakî û xwepêşandan li dar xistin. Di vê çarçeweyê de jî gelek konsêrt ji bo alîkariya qurbanên berxwedanê (Berxwedana Avdara Rojava) hatin lidarxistin, û hîne jî berdewam in.

Roja 14.05.2004-an li Göteborg-ê / Swêd hunermendên kurd (Ciwan Haco, Beytocan û Xweşnav) konsêrta xwe ya piştgiriya serhildana Başûr-rojavayê Kurdistanê li dar dixin. Hêjayî gotinê ye ku di vê konsêrtê de rêzdar Kerîmo (şano) û Ehmed Huseynî (helbest) beşdar dibin.

Roja 15.05.2004-an Şivan Perwer li bajarê Bonn-ê / Almaniya konsêrteke alîkariyê li dar dixe. Ji bilî Şivan Perwer Ebas Ehmed, Evîna Welat û Fatê dê di konsêrtê de beşdar bibin.

Herweha di heman rojê de kurdên Kopenhagen-ê / Danîmark konsêrtekê bi heman mebestê li dar dixin. Konsêrta Kopenhagen-ê dê ji aliyê Ciwan Haco, Xweşnav, Şêrîn, Mesûd Muhemedî, Gropa Aheng, Xalêd Sofî û Koma Nûhilat de tête şênkirin.

Li Zürich-ê / Swêsra jî roja 23.05.2004-an hunermendên kurd (Evîna Welat, Saîd Gabarî, Sîpan, Zoro Yûsif û Zubêr Salih) bi heman armancê konsêrteke hevbeş li dar dixin.

Di 19., 21., 23. û 25-ê vê heyvê de jî Ciwan Haco û Xêro Ebas çar konsêrtan li Emerîka li dar dixin.