Analîz – Bask û perên Mesûd Barzanî şikestin

KK-Nûçe-Analîz *

HEWLÊR, 01.02.2004 — Îro li Hewlêrê bask û perên serokê Partiya Demokrat ya Kurdistanê Mesûd Barzanî şikestin. Êrişa îro ne tenê karesateka neteweyî ya gelê kurd bû. Di vê êrişê de hevbîr û hevkarê herî nêzîk yê Mesûd Barzanî, cihgirê serokwezîrê Kurdistanê û sekreterê Partiya Demokrat ya Kurdistanê Samî Ebdurehman hat kuştin. Samî Ebdurehman pîrê siyasetê û dîplomasiya kurdî ya van 40 salên dawiyê bû. (Wêne: Samî Ebdulrehman)
Samî Ebdurehman siyasî û bîrewerekê wisa bû ko Mesûd Barzanî bi piştrastiyeka temam hemî karên neteweyî yên kurdî dispart wî. Gava ko karek teslîmî Samî Ebdurehmanî dibû hêdî pêwistî bi xem û mereqa ka ew kar dê çawa bi rê ve biçe, yan ka berjewendiyên neteweyî yên kurdan di wî karî de dê çawa bêne parastin nedima. Ji ber hindê jî Mesûd Barzanî danana qanûna bingehî ya nû ya Iraqê û Kurdistanê spart Samî Ebdurehmanî û got bila ew nûnerayetiya kurdan di komîsyonên amadekirina qanûna bingehî de bike.
Samî Ebdurehman wekî cihgirê serokwezîrê Kurdistanê Nêçîrvan Barzanî bûbû pişta Niçîrvan Barzanî û di têkiliyên dîplomatîk yên nêvneteweyî de palpiştê herî pêbawer ya Nêçîrvan Barzanî bû. Piştî ko herdu hikûmetên Kurdistanê dest bi prosesa yekkirina herdu hikûmetan kirin Mesûd Barzanî sekreteriya Partiya Demokrat ya Kurdistanê spart wî ji ber ko Samî Ebdurehmanî bi îhtimaleka mezin cih di hikûmeta yekgrtî de nedistand.
Ji bo Mesûd Barzanî peydakirina yekê ko cihê Samî Ebdurehmanî bigire ne mimkin e û di van çend mehên bên de tesîrên karesata îro dê hem li ser Partiya Demokrat ya Kurdistanê û hem jî li ser neteweya kurd diyar bibin. Aktorekê herî naskirî û jêhatî yê dîplomasiya Kurdistanê hêdî ne di meydana siyasetê de ye û cihê wî heta demekê dirêj jî dê vala bimîne.

*) ev analîz ji malpera www.kerkuk-kurdisatn.com hatiye girtin