efrin.net 31.07.2003

Semînareke Emar Bekdaş li Efrînê
 

efrin.net
Efrîn, 29.07.03
Roja 28.07.2003-an li Bajarê Efrînê sêmînarek ji aliyê Partiya Komonîst ya Sûriyê (Baskê Xalêd Bekdaş) di bin sernava “Partiya Komonîst û ragihandin” hate lidarxistin. Gotederê semînarê rêzdar Emar Bekdaş (lawê rehmetî Xalêd Bekdaş) bû.
Rêzdar Bekdaş di axaftina xwe de li ser rewşa cîhanê, ya erebî û li dawiyê jî li ser ya hundrîn rawestî. Lê mixabin ewî di axqaftina xwe de, ne ji dûr, ne ji nêzîk, çêra rewşa kurd ne kir. Lê beşdarekî semînarê kir ku ew (Emar Bekdaş) li ser vê rewşê jî baxife. Lew wî pirsek ji çend mofirkan ji wî pirsî, ku ew jî li ser helwest û siyaseta Partiya Komonîst beramberî:

1. guhartina navên herêmên kurd, ango siyaseta erebkirinê,
2. rewşa kurd li Îraqê çi ye
3. “serjimartina awarte ya stemkar” li Cizîrê.

Di bersiva xwe de rêzdar Bekdaş sebaretî erebkirinê helwesta xwe weha anî zimên: “Em li dijî kirineke weha ne, ji ber ku ew li dijî mirovatiyê ye. Mafên Kurd û Ereban li Sûriyê weke hev in.”
Sebaretî rewşa kurd li Îraqê jî ewî got: “Em bi awayekî giştî bi Kurdan re ne, lê em ne bi wan kesan re ne, yên ku bi Emerîka re hevpeyman bin. Herweha em bi federaliya Îraqê re ne jî.” Ewî hîn berdewam kir û got: “Rehmetî Xalêd Bekdaş li Sovyetistanê got, ez jî li Efrînê dibêjim: Em bi avakirina Kurdistana Mezin re ne, li Tirkiye, Îran û Îraqê.” Vêca yekî ji beşdaran bi ser ve kir û got: " û li Sûriyê."
Li ser “serjimartina awarte” jî Rêzdar Bekdaş got: “Em ji bêtirî sih salî de li ser vê rewşê daxifin. Di xola perlemanê a nuha de jî, di daniştina pêşîn de, min daxwaza rakirina (îbtalkirina) vê yasayê kir. Herweha me pirî caran di rojnameya partiya xwe de doza vê yekê kirî.”
 

efrin.net 26.07.2003

Kobaniyê Siyamend Îbrahîm hembêz kir

Rêzdar Siyamend Îbrahîm roja 24.07.2003-an semînarek li bajarê Kobanî li dar xist. Di semînarê de gelek kesên çand- û zimanhez beşdar bû bûn. Mamoste Siyamend di semînarê de bi ferehî li ser rewşa çanda kurd li Sûriyê axifî. Herweha ew li ser kovara Aso jî rawestiya, ya ku ew hem sernivîserê wê, hem jî berpirsiyarê wê yê giştî ye.

efrin.net 26.07.2003

Pênûsa nû derket
 

efrin.net
26.07.03
Hejmara 14-ê ya kovara “Pênûs” kete destê xwendevanên xwe. Herweha ewê pir nêzîk di malperê de jî (www.efrin.net/penus) li ber destê we be.
Ev hejmara jî – weke hertim – ji 100 rûpelî hevedudan ye, û piraniya wê (85 rûpel) bi zimanê kurdî ye.
Di beşê kurdî de gelek berhemên hêja çî girti e; ji wan:

1. Gureyarê xwe navêje; dr Kamiran Bêkes
2. Pirsa kurd bi çavên “demokratekî” ereb; Ehmed Abdalo
3. Gelê kurd li Kurdistana Sûriyê; dr. Ebdilmecît Şêxo
4. Hemreş Reşo; Bedirxan Eppzdemir
5. Nirxandinên yekalî; Lokman Polat
6. Ehmeqî; dr. M. Zeyno
7. Mem û Zîn; Albert Socin û Eugen pyrm
8. Bingehên gotinê; Keça Kurd
9. Zubêr Salih ji Pênûsê re dipeyive; Dilyar Dêrikî
10. Alole (çêrok); Perwîz Cîhanî
11. Lê ka Birîva; Ebdulrehman Efîf

Herweha hin helbest û nivîsarên din jî naveroka pênûsê xemilandine.
Di beşê erebî de jî (ku ji 15 rûpelan hevedudan e) berhemine hêja cî girtine; ew jî ev in:

1. براعم الكرد في دمشق، نوري بريمو

2. الذكرى الثلاثون لمشروع الحزام العربي، سردار بدرخان

3. حسين حبش يوزع الورد في ساحات عفرين، زهير كاظم عبود

4. قصائد قصيرة جداً، عمر أوسو

5. أطفال أرض سمراء، بيريفان باكير

Hêjayî gotinê ye ku sernivîserê kovarê (dr. Kamiran Bêkes) sernivîsara vê hejmarê (Gur eyarê xwe navêje) li ser salvegera 46-ê ya damezrandina yekem partiya kurd li Sûriyê, xwepêşandana zarokên kurd li Şamê û pêdiviyên demê nivîsandiye. Em kêfxweş in ku li vir temna wê sernivîsarê pêşkêş bikin.
 

efrin.net 23.07.2003

Udey û Qusey hatin kuştin
 

efrin.net
23.07.03
Duh êvarî Richardo Sanchez, serokê hêzên emerîkî li Iraqê piştrast kir ku wan herdu kurên Sedam Husênî, Udey û Qusey kuştine.
Hêzên leşkerî yên emerîkî duh li nêzîkî Mûsilê êriş biri bûn ser malekê û herdu kurên Sedam Husênî, Udey û Qusey kuştin.
Paul Bremerê admînîstratorê sivîl yê Iraqê gotibû her kesê Udey û Qusey sax yan mirî nîşa emerîkiyan bide ew dê ji bo her yek ji wan 15 milyon dolaran bide kesê ko giliya wan bike. Vêca Şêx Mihemed Zeydan, yê ku Udey û Qusey xwe li mala wî veşarti bûn, û yê ku – li gor hinek agahiyan – li wan dabû, nuha hêvî dike ku bibe milyoner û 30 milyon dolaran wekî xelat ji Emerîkayê bistîne.
Ji aliyekî din ve weha xuya ye ku emerîkî dikin wêneyên laşên herdu kuştiyan belav bikin, da ku ew gumana ku li ba xelkê heye jî bête hilanîn.
 

efrin.net 21.07.2003

Heft rêxistinên kurd nijadperestiya Sûriyê rûreş dikin
 

efrin.net
21.07.2003
Ji bo rûreşkirina helwest û kiryarên destlata Sûriyê beramberî xwepêşandana zarokên kurd li Şamê, ya ku roja 25.06.2003-an hati bû lidarxistin, îro heft rêxistin û partiyên kurdistanî li Swêdê nameyeke rûreşkirin û protestoyê pêşkêşî balyozxaneya Sûriyê li Swêdê kirin. Herweha wan rêxistinan girtina her heft kesên kurd jî, yên ku di wê xwepêşandanê de hati bûn girtin, bi bîr anîn û ji hemû dezgehên swêdî û yên navnetwî daxwaz kirin ku ew dengê xwe ligel Kurdan hildin û ji dewleta Sûriyê bixwazin ku:

1. hebûna 2,5 milyon Kurd nas bike û mafên wan ên rawa bide wan;
2. mafê hemwelatiyê li wan 250 hezar Kurdan vegerîne, yên ku hîn di sala 1962-an di encama serjimartina awarte de ji wî mafî hatine bêpar kirin;
3. projeyên nijadperest ên asimîlekirinê rake;
4. hemû girtîyên siyasî yên kurd, kevn û nuh, zû serbest bike.

Rêxistinên ku beşdarî vê çalakiya hêja bûne ev in:
– Federasyona Komeleyên Kurdistanê li Swêdê
– Înstiativa Kurdên Swêdê.
– Komiteya Hevkariya Rêxistinên Kurd û Kurdistanî li Swêdê
– Partiya Çep a Kurd li Sûriyê
– Partiya Demokrat a Kurd li Sûriyê - (Elpartî)
– Partiya Hevgirtina Gelê Kurd Li Sûriyê
– Partiya Yekîtî ya Kurd li Sûriyê
 

efrin.net 21.07.2003

Rêzdar Ismaîl Emo di “Koçka Qamişlo – bajarê evînê” de
 

Rêzdar Ismayîl Emo, serokê Partiya Yekîtî ya Demokrat a Kurd li Sûriyê, semînarekê li ser Tevgera Kurd di koçka qamişlo – bajarê evînê de pêşkêş dike. Semînar dê roja Pêncşemê 24.07.2003-an li katjimêr 21.00 li dar dikeve. Herkes vexwendiyê vê semînarê ye. Herweha mera hêvî dike jî ku herkes bi pirsên xwe semînarê dewlemend bike.
 

efrin.net 17.07.2003

Serdana Mîr Celadet û şevbuhêrkeke çandî li Şamê
 

efrin.net, 17.07.03
Şêx Birîmce, Şam

Roja 15.07.2003-an, li katjimêr 19.30 îvarî, li ser daxwaza komîta amadekar ya şevbuhêrkên kurdî li Şamê -Taxa Kurdan- bêtirî sed kesî ji nivîskar, rojnamevan, helbestvan, rewşenbîr, zimanhez, welatperwer, xwendevan û gurzek ji perwanên hêje keçên kurd û çend jinên hêja li goristana Şêx Xalidê Neqişbendî li ser gora nemir mîrê ziman û çanda kurdî, neviyê Bedir-Xanê gewre civîyan. Bi vêxistina mûman û bi baxên gul û kulîlkan gora Mîr xemilandin; baxeke ji wan bi navê komîta amedekar ya şevbuhêrkên kurdî li Şamê û yên dî bi navê van mamoste û rêdzaran bûn: Helbestvana hêja Diya Ciwan, helbestvan Husên Ehmed, Daryos Darî, nivîskar Ehmed Mihemed.
Hêjayî gotinê ye ku nameke devkî ji Almanya bi navê mamoste Sîrwan Hecî Berko, xwediyê malpera Amûdê (www.amude.com), bi ser de jî birûskek digel baxeke gul ji mamoste Husên Ehmed. Herweha ji nivîskar û romanivîs Bavê Nazê, zimanzan Rizo Osê, nivîskar û helbestvan Dildarê Mîdî, helbestvan Ferhad Icmo, helbstvan û nivîskara hêja Bêwar Îbrahîm nameyên devkî hebûn.
Rêwresimê bi kurtegotineke devkî, ku ji aliyê nivîskar Şêx Birîmce de hetî gotin, û bi xwendia Ayeta Qurana pîroz “Fatîhe” li ser giyanê Mîr û malbata Bedir-Xwaniyan û hemî xebatkarên ziman û çanda kurdî dest pê kir. Li dawiyê jî helbestek, ku li ser mîr Celadet bû, ji aliyê nivîskar Konê Reş de hate kutakirin.
Piştî girtina hin wêneyên ji bo bîranîna vê rojê, piraniya beşdaran çûn di maleke kurdperwe de şevbuhêrkek li dar xistin. Mamoste Rostem Hemzê mîvanê şevbuhêrkê, mamoste Konê Reş bi kurtejîyaneke kurt li ser rewş, jiyan û xebata mamoste ya kesayetî û torevanî ji beşdarên şevbuhêrka kurdî ya taybet re da nasîn.
Lehengê vê şevê, nivîskar û helbestvanê hêja Konê Reş bû. Ewî bi sê gotarên nirxbuha ev şev xemiland. Gotarek li ser xebata Mîr a rêzanî û rojnamevnî “Mîr Celadet Alî Bedir-Xan di navbera polîtîk û rojnamevniyê de” bû, ya dî gotareke bi navnîşana “Nirxandineke kurt li dor Mîr Celadet Alî Bedir-Xan” bû, ya sêhem jî di bin sernava (Ala Kurdistan bi danîna bedirxaniyan û hildana berzanyan). Herweha ewî du helbest jî xwendin, ku yek ji wan li ser xwepêşandana zarokên kurd li pêş Unicef-ê roja 25.06.2003-an bû.
Bi danûstandineke wêjeyî, têbînî û rexneyî ji aliyê mamosteyên beşdar şev dewlemend dibû û bilez baz dida.

Têbînî: Di nûçeya me ya ku berî çend rojan belav bû bû şaştiyek çê bû bû. Me di wê nûçeyê de goti bû ku gora dr. Kamiran jî li ba mîr Celadet e. Lê a rast ew e ku dr. Kamiran li goristanekeke Parîsê li Firansa hatî veşartin. Em lava lêborînê ji xwendevan dikin.
 

efrin.net 12.07.2003

Îtîfaqa Emerîka Û Kadekê Pîroz be!
 

Fuat Akpınar
akpinar@t-online.de
Almaniya, 12.07.2003

Min îro (12.07.2003) di radyoya Dengê Mezopotamya de heypevîneke digel birêz Osman Ocalan (endamê konseya Kadek-ê) guhdar kir. Birêz Osman Ocalan di heypeyvînê de ji bo bûyerên nû li Rojhilata Navîn û bûyerên di navbera Emerîka û Tirkan de dîtin û nêrînên xwe anî zimên û di gotinên xwe de gelek tiştên balkêş gotin. Ev cara yekem e ku berdevkê Kadek-ê ji bo Emerîka gotinên pir pozîtîv dibêje û kirinên Emerîka li Îrakê pêşverû dibîne. Birêz Osman Ocalan di radiyoya Dengê Mezopotamya de wiha got: “Emerîka pozîsyoneke pêşverû girtiye.”
Birêz Ocalan rola Emerîka li Viyetnam û Îrakê da ber hev û got: “Li Viyetnamê, ku Emerîka piştî Şerê Cîhanê yê Duyem cihê kolonyalîstên firensî girt, di pozîsiyona parastina sîstema kevnar û paşverû de bû û, ji lew re jî, bi ser ne ket. Lê li Îrakê ew di pozîsiyona pêkanîna sîstemeke nû û demokrat de ye. Ewên ku li Îrakê li dijî Emerîka şer dikin, tiştê kevin û paşverû diparêzin. Ji ber wê jî, ewê bi ser nekevin. Di bin axa Îrakê de ne tenê petrol heye, lê belê ji termê mirovan jî tije ye, ewên ku bi destê rêjîma Sedam hatine kuştin.” Û wiha berdewam dike: “Kurd hazir in ku ji bo maf û heqên xwe bi Amerîka re îtîfaq bikin.”

Belê ev gotin têye wê wateyê ku KADEK di pirsa Emerîka de ketiye pêvajoyeke nû. Ev bûyer ji bo gelê kurd û Kurdistanê bûyereke gelek baş e. Ev gotinên birêz Osman Ocalan ji min re têne wê manê ku PKK/KADEK êdî antî-Emerîka nîne.
Ev guhertin vî tiştî jî baş rayî me dide, ku îdeolojiya qaşo-sosyalîzim û komûnîzima bi qirêj û gemar, îdeolojîya qaşo çepên Tirkan yên kevneperest jî îflas kir û KADEK êdî bi vê îdeolojiyê îtîbar nake û xwe li gor siyaseta cîhanê ya maqûl diguherîne.

Eger îtîfak di navbera Emerîka û KADEK-ê de îtîfaqeke jidil (samîmî) be, dê siyaseta Kurdan bi tevayî ji bin bandora Tirkan derê û ev jî silametiya Kurdan e.
Dem ji Kurdan re demeke pir nazik û dîrokî ye. Eger têkiliyên Kadek-ê bi Emerîka re pêş de herin, ev têye wê wateyê ku di pêşerojê de înisyatîveke pir xurt dê têkeve destê Kurdan. Yanê rojên jiholêrakirin û çirandina Peymana Lozanê ne dûr in. Belê ew Peymana ku bêyî razîbûna gelê kurd hati bû çêkirin, gelê kurd tu caran nas ne kir û nas jî nake, dê di pêşerojê de bête çirandin û li nava çavê Tirkan û Ewropiyan bikeve.
Nakokiyên van rojan, yên di navbera Emerîka û Tirkan de li ser girtina 11 eskerên Tirkan li Silêmaniyê jî baş rayê dide, ku êdî tamîrkirina têkiliyên wan ne hêsan e.
Dewleta devrût niha ketiye şokeke pir mezin û nizane çi bike. Ji ber ku ev cara yekem e têkiliyên wan wisa bi Emerîka re xerab bûne. Emerîka jî roj bi roj Tirkan baş nas dike û ji bo wan jî baş dertê holê, ku Tirk di siyaseta xwe de jidil (samîmî) nînin.

Divê Kadek ne tenê bi biyaniyan re, lê bi hêzên Başûrê Kurdistanê re jî têkiliyên xwe baş bike, li ser bingeh û di çarçoveya neteweyî de tevbigere û fen û fûtên dijminan pûç bike.

Bûyerên nû yên baş ji bo gelê kurd û Kurdistan pîroz bin.
 

efrin.net 11.07.2003

Serdana Mîr Celadet Bedir-Xan
 

efrin.net, Şam
11.07.2003

Komîta amedkar ya şevbuhêrkên kurdî li Şamê (taxa Kurdan) bi daxwaza çûna ser gora mîrê çanda kurdî, dê di 15.07.2003-an de dest bi saleke dî ye çadî bike. Belê komîta navborî dê sala xwe bi bîranîna 52-salîya koçbarkirina mîr Celadet Alî Bedir-Xan nuh bike.
Weke têt zanîn Mîr di goristana şêx Xalidê Neqişbendî yê kurd de bi cih bûye. Ev guristana bi rêzdarî û serbilindî giyanê penaberên kurd, yên ku li vir jiyane û li vir çûne dilovaniya Xwedê, wek Mîrê me yê bê hempa Celadet û birayê wî Kamiran û xanima wî Rewşen xanim, hempêz dike.
Komîta amedekar ya şevbuhêrkan nameyeke nivîskî li ser beşdarên şevînên xwe û hemû dostên çanda kurdî û cemawerê xwe belav kirî û ew agahdarî vê çalakiyê kirine.
Helbet em gelek bi vê çalakiyê serbilind in û bi hêvî ne ku ev kar bi coşeke mezin were hembêzkirin.
Bi vê boneya hêja jî rm hêvîdar in ku em li zimanê xwe bêtir xwedî derkevin û dest bi fêrbûn û fêrkirina zimanê kurdî bikin, zarokên Kurdan hînî xwendin û nivîsandina zimanê dayikê bikin.
Eger em bi rastî dixwazin li Mîrê xwe yê nemir xwedî derkevin, divê berî hertiştî em li zimanê xwe xwedî derkevin, ev zimanê ku ewî hîmên rêziman û rastnivîsandina wê danîne. Belê divê em berî hertiştekî din lim zimanê xwe xwedî derkevin, çunkî “miletên bindest heyîna xwe ji serdestên xwe bi du tiştan, bi qeweta du çekan diparêzin. Ol yek. Ziman dudo. Lê heke ola miletê serdest û bindest yek bibe, hingî çek yek bi tenê ye û bend tenê ziman e”.
 

efrin.net 02.07.2003

Edvokatên Kobaniyê piştgir in
 

Kobanî, efrin.net
02.07.2003
Gropeke ji edvokatên herêma kobaniyê namake rûreşkirin û protestoyê ji şalyarê karûbarê hindirîn yê Sûriyê, Elî Hemûd re bi rê kirin û tê de piştgiriya hemwelatiyên kurd yên ku roja 25.06.2003-an, di dema xwepêşandana zarokên kurd li Şamê de, bê sûc û sedem ji hêla hêzên ewlekariya destlatê ve hati bûn girtin û binçavkirin. Evokatên kurd di nameya xwe de didin xuyakirin ku ev karê ku wan kirî, karekî rewa, destûrdayî ye, herweha ew ne li dijî yekîtiya niştîmanî ye jî. Lewre jî ew dibînin – û doza wê yekê jî dikin – ku divê ew girtiyan di zûtirîn de bêne azadkirin.

Edvokatên ku ev name îmze kirine ev in:

Berkel Hemî
Bozan Bekî
Dara Ebdî
Ebdela Îmam
Faroq Hinko
Ferhad el-Baqir
Ferhad Şahîn
Fewzî Elî
Hesen el-Mihemed Elî
Hesen Nebo
Mehmûd Bedirxwan
Mehsûm Elî
Mihemed Ebdo
Mihemed Elî Temo
Mihemed salih hesen
Mihidîn Îsmayîl
Mistefa Elî Misto
Omer Zekî
Redîf mistefa
Xelîl Eslan
 

efrin.net 01.07.2003

Gelê kurd li Sûriyê rabûye ser piyan wek dilêr
 

Heleb, efrin.net
01.07.2003
Duh (Duşem, 30.06) li bajarê Heleb bi sedan welatiyên kurd li taxên Kurdan xwepêşandanek li dar xistin. Armanca wan ew bû ku destlata Sûriyê wê qedexekirinê, ya ku li ser çand û zimanê kurdî heye, ji holê rake. Lê – weke hercar – ev çalakiya jî di çavên şovenistan hilnehat, lewra jî hêzên asayîş û ewlekariyê yên destlatê bi şêweyeke tund û hov bi vê xwepêşandanê re têkel bûn û dora 50 kesî binçav kirin.
Hêjayî gotinê ye ku berî vê xwepêşandanê tenê bi çend katjimaran serokê Sûriyê Beşar el-Esed li Helebê bû.

Weha xuya ye ku gelê me li Sûriyê êdî “rabûye ser piyan wek dilêr” ta li maf û azadiya xwe xwedî derkeve.
 

efrin.net 01.07.2003

Seroka PEN-a Kolombiyayê û xwepêşndana zarokên kurd
 

efrin.net, 01.07.2003
Piştî ku Komîteya Wergerandin û Parastina Zimên ya Navenda PEN-a kurdî di daxuyaniyeke xwe de bangî PEN-ên din li cîhanê kir ku ew piştgiriya daxwazên Navenda PEN-a Kurd, yên ku di wê daxuyaniyê de hati bûn destnîşankirin, bikin seroka PEN-a Kolombiyayê, birêz stiya Cecilia Balcázar de Bucher di nameyeke xwe de xemgîniya xwe ji ber rewşa Kurdên Bashûrê Rojava bi giştî û xwepêşendana zarokan Şamê bi taybetî nîşan da.

Weke tête zanîn Komîteya Wergerandin û Parastina Zimên ya Navenda PEN-a kurd daxuyaniyek bi zimanê îngilîzî derxist û tê de piştgiriya xwe ji bo xwepêşandana zarokên kurd li Şamê anî zimên û daxwaza serbestkirina perwerdeya bi zimanê kurdî li Sûriyê kir. Herweha PEN-a Kurd di daxuyaniya xwe de li ser rewşa ziman û wêjeya kurdî li Sûriyê radiweste û radigihîne ku ew ji ber qedexkirin û çewsandinê di rewşeke pir dijwar re derbas dibin. Ji bilî vê yekê jî Navenda PEN-a Kurd bangî PEN-ên din li cîhanê dike, da ku ew piştgiriya daxwazên Navenda PEN-a Kurd bikin û ji rêjîma Sûriyê doza serbestkirina zimanê kurdî li Sûriyê bikin.