efrin.net 30.06.2003

Ji serxwebûn û azadiyê bi rûmetir tiştek nîne
 

efrin.net, 29.06.2003
Li gor ku malpera www.kerkuk-kurdistan.com ragihandî Konseya Serokatiya Kadakê (ya ku berê navê xwe Partiya Karkerên Kurdistanê bû) daxuyaniyek (Ozgur Politika, 27.06.2003) derxist û tê de li ser plana Tirkiyeyê ya derxistina zagoneke nû ye poşmaniyê radiweste. PKK-Kadek di daxuyaniya xwe de diyar dike ku divêt tirkî zimanê fermî yê Tirkiyeyê û Bakurê Kurdistanê be, lê belê di dibistanên destpêkê de divêt zarokên kurdan bikarin bi kurdî perwerde bibin.
Di daxuyaniya PKK-Kadekê de heft daxwaz hene, ku hinek ji wan ev in: serbestkirina zimanê kurdî ya di televizyonê de, pejirandina nasnameya kurdî û derxistina lêborîneke giştî. Di benda pêncê de PKK-Kadek dibêje ku “divêt hemî xebatên siyasî yên ku zor tê de nebin, yekîtiya siyasî ya Tirkiyeyê tehdîd nekin û di çarçeweya van mafan de, yên ku me li jorê destnîşan kirine de bimînin, bêne serbest kirin”.
PKK-Kadek dibêje heger ku Tirkiye van daxwazên wê bipejirîne, ew (Kadek) dê bibe parêzvana yekîtiya axa Tirkiyeyê û rê nede ku kes daxwazên radîkaltir ji Tirkiyeyê bike. Wateya vê lixwegirtinê ya pratîk jî helbet ew e ku eger li Bakurê Kurdistanê mirovek yan partiyeke kurdî bi gotin yan nivîsandin jî daxwaza serxwebûnê, federaliyê yan jî otonomiyê ji kurdan re bike, hingê PKK-Kadek dê li dijî wî kesî yan wê partiyê raweste.

Berî pênc rojan jî (Ozgur Politika 22.06.2003) – dîsan li gor kerkuk-kurdistan – serokê PKK-Kadekê Abdullah Ocalanî di hevdîtineke xwe ya digel eboqatên xwe de careke dî êrişî serokê Partiya Demokrat ya Kurdistanê Mesûd Barzanî, sekreterê giştî yê Yekîtiya Niştimanî ya Kurdistanê Celal Talebanî kir û got ew “nijadperestên kevnare” ne. Di heman demê de jî wî êrişî Abdulmelik Firat, serokê Hak-Parê kir û got ku ew lehîstokeke bive ya “miliyetçî” dilîze. Her di wê hevdîtinê de Abdullah Ocalan aşkera Mustafa Kemal Ataturkî diparêze û dibêje ku ew “pêşvero bû, esilzade bû, şerefmend bû”.

Vêca ev gotin li kû, û “ji serxwebûn û azadiyê bi rûmetir tiştek nîne” li kû!
 

efrin.net 28.06.2003

Rêxistina Mafên Mirov li Sûriyê doza parastina mafê xwepêşandanan dike
 

efrin.net, 28.06.2003
Rêxistina Mafên Mirovî li Sûryê duh di daxuyaniyeke xwe de ji rêjîma Sûryê doza parastina mafê xwepêşandanan li Sûriyê kir.
Di daxuyaniyekê de Rêxistina Mafên Mirovî li Sûriyê doza çareserkirina pirsa kurdî li Sûriyê jî kir. Herweha wê ji rêjîmê xwast ku ew hemû mafan bidin Kurdan, da ku ew jî bikari bin weke welatiyên Sûriyê yên din bijîn.
Derbarî girtiyên xwepêşandana zarokên kurd li Şamê, rêxistinê ji rêjîmê xwast ku bilez û yekser wan heyşt girtiyên kurd ji binçavkirinê azad bike.
Di dawiya daxuyaniya xwe de rêxistina navborî piştrast kir ku – heta li gor destûra Sûriyê jî – mafê her kesî li Sûriyê heye ku bi riyeke aştiyane protestoyê bike. Herweha wê bangî rêjîmê kir ku problêmên welatiyan bêyî pêkanîna zorê çareser bike.
 

efrin.net 28.06.2003

Çalakiyên zarokên kurd dê sêwî nemîne
 

efrin.net, 28.06.2003
Berpirsiyarê rêxistina Ewropayê ya Partiya Yekîtî ya Demokrat a Kurd li Sûryê Ehmedê Çeto duh êvarî di axaftineke xwe di Koçka Qamişlo ya paltalkê de ragihand ku Hevbendiya Demokrat a Kurd li Sûryê biryara çalakiyeke rûreşkirin û protestoyê, ku dê di demeke nêzîk de li pêşiya wezareta karûbarên hundir li Şamê pêk were, standiye.
Herweha ewî ragihand ku Hevbendî niha amadekeriya protestoyeke mezin dike û dê di demeke nêzîk de li ser vê yekê bi partiyên din re baxife, da ku bi hev re bi vê çalakiyê rabin. Çimkî – dîsan gotin ya Ehmedê Çeto ye – partiyeke bi tenê tenê nikare problêmên Kurdan li Sûryê çareser bike. Lewre jî ew yekîtiya Tevgera Kurd pêwîst dibîne. Ev yeka jî – li gor wî – dikare pêk were, eger partî gotarên (xîtabên) xwe biguherînin û dev ji helwesta "tu bi min re kar nakî, ango tu xerab î" berdin. Ji bo ku yekîtî pêk were jî Çeto biryara partiya xwe, ya ku berî demekê di civata serkirdayetiyê ya fereh de hati bû standin, dubare kir û got: “Pêwîste hemû partiyên kurd li hev bikin û di kongireyeke netewî de li ser xebateke hevbeş baxifin.”
 

efrin.net 27.06.2003

Rêzdar Şêx Dawod ji êzga dengê Emerîka re
 

efrin.net, 27.06.2003
Roja 25.06.203-an li katjimêr 14.00 Êzga Dengê Emerîka hevpeyivîneke zindî bi endamê Komîta Rêzanî ya Partiya Yekîtî ya Demokrat a Kurd li Sûriyê (Yekîtî), rêzdar mamoste Şêx Dawod (Bavê Mesûd) re kir. Peyvdarê wê êzgê, mamoste Xelefê Zîbarî danûstendineke sebaretî xwepêşandana zarokên kurd, ya li pêşiya UNICEF-ê (25.06.2003) li bajarê Şamê, kir û çend pirs di vî warî de ji rêzdar Şêx Dawod kirin.
Di vê danûstendinê de rêzdar Şêx Dawod di bersivên xwe de weha anî zimên û got: “Di 25.06-an li bajarê Şamê katjimêr 10.45 li dora dused zarokên kurd ji herêmên kurd û ji bajarê Şamê berê xwe ji bo armancên jêrîn dan avahiya UNICEF-ê:
– Bi navê zarokên kurd li Sûriyê pîrozkirina zarokên cîhanê bi boneya Roja Cîhanî ya Zarokan
– Diyarkirina derd û kovanên zarokên kurd û çewsandina ku ew dikşînin ji zarokên Sûriyê û cîhanê re bi riya memorandumekê, ku wan li ser vê yekê amade kiri bû.

Di wê xwepêşandanê de zarokan kurd gul hilgirti û sê durişm, yên ku daxwazên wan aşkere dikirin, hilda bûn. Ev durişm jî ev bûn:
– Berve zaroktiyeke şad û kamiran dûrî newekhevî û çewsandinê
– Vegerandina nasnameya Sûriyê li Kurdên bê nasname
– Mafê hînkirina zimanê bav û kalan.

lê mexabin wan zarokan nikari bûn memoranduma xwe bigihandanabaregeha UNICEF-ê, ji ber qedexekirina ku ji aliyê hêzên parastin û polîsan ve hati bû holê û rêbirîna ku li pêşiya wan zarokan hati bû kirin û bi ser de jî ji ber lêxistin, lêdan û girtina hinek ji xwediyên wan zarokan.

Herweha rêzdar Şêx Dawod da xuyakirin ku çar partiyên kurd piştgiriya vê xwepêşandana zarokan kirine û ew destek kirine, herweha wan partiyan daxwaza azadkirina girtiyan jî, di daxuyaniyeke hevbeş de, kirine. Ev partî jî ev in:
– Partiya Çep a Kurd li Sûriyê
– Partiya Yekîtî ya Kurd li Sûriyê
– Partiya Hevgirtina Gelê Kurd li Sûriyê
– Partiya Yekîtî ya Demokrat a Kurd li Sûriyê (Yekîtî).
 

efrin.net 25.06.2003

Xwepêşandana zarokên kurd bi çavsorî hate pêşwazîkirin
 

efrin.net, 25.06.2003
Xwepêşandana ku îro bi boneya Roja Cîhanî ya Zarokan ji hêla çar pertiyên kurd ve hati bû organîzekirin bi çavsorî û bi lêdan, gefûgur û girtinan bi dawî hat. Hêzên şaoven ne hêştin ku zarokên kurd bigihin avahiya UNECEF-ê. Wan berî ku xwepêşandan bigihe armanca xwe bi 150 mitrî ew dorpêçkirin û rê li pêş girtin. Loma jî tukesî nikari bû memorandum, ya ku bi mebesta diyarkirina daxwazên zarokên kurd hati bû amadekirin, bigihanda serpereştên baregeha UNICEF-ê ya li Şamê.
Li ser vê yekê rêzdar Ebdilbaqî Yosif, sekreterê Partiya Yekîtî ya Kurd di hevpeyvîneke bi beşê kurdî ya Radyo Flora li bajarê Hannoverê ragihand ku xwepêşandan dora demjimêr 10.45 dest pê kir û dora 300 kesî (ji wan 200 zarok) beşdar bû bûn. Rêzdar Yûsif herweha ragihand ku hejmara polîs û hêzên asayêşa sûrî 2-3 caran ji ya xwepêşandêran bêtir bû. “Berî ku em bigihin pêşiya avahiya UNICEF-ê bi 150 mitrî, hêzên sûrî ketin pêşiya me û dest bi lêdanan kirin”, weha Yûsif ji radyoyê re got. Wî hîn jî got ku polîsan li zarok û mezinan dixistin û gefûgur li wan didan. Herweha wî diyar kir ku 7 kes hatine binçavkirin. Ew heft kesan jî – dîsan li gor rêzdar Ebdilbaqî Yosif – ev in: Parêzger Mihemed Mistefa, Şerîf Remedan, Xalid Mihemed, Amer Mûrad, Salar Saleh. Ji van pişt re sê kes hatin berdan
Li gor agahiyên Kurdmedia.com dema ku polîs ketin pêşiya xwepêşandanê, zarokên kurd li cihê xwe rûniştin û dest bi stranên kurdî kirin.
Hêjayî gotinê ye ku, di xwepêşandanê de, zarokên kurd daxwazên xwe li ser plakatan bilind kiri bûn; ew daxwaz jî ev bûn:
1. Xwendin û perwerdekirina bi zimanê dayikê
2. Pejirandina nasnameya kurdî
3. Hilanîna embargoya li ser herêma Kurdan
4. Wekheviya zarokên hemû netewan li Sûriyê.

Tê zanîn ku ew xwepêşandana ji aliyê çar partiyên kurd ve (Partiya Yekîtî ya Kurd, Partiya Yekîtî ya Demokrat a Kurd (Yekîtî), Partiya Hevgirtina Gelê Kurd û Partiya Çep a Kurd) hati bû amadekirin.
Bi vê boneyê herçar partiyên ku ev çalakî amade kirine daxuyaniyeke hevbeş derxistin û ev kirinên hov diyarkirin.

Weke tê zanîn di 10.12.2002-an de jî Partiya Yekîtî ya Kurd xwepêşandaneke aştiyane li pêş perlemana Sûriyê li dar xisti bû û di encamê de du endamên Nivîsgeha Rêzanî ya wê partiyê (Hesen Salêh û Merwan Osman) hati bûn girtin.
Weha xuya ye ku destlata şoven û nijadperest, herçendî guhartin li cîhan û herêmê biqewimin jî, şêweya danûstandina xwe bi doza gelê me ya rewa, dadmend û demokrat re neguhêre. Ango “erê gur tûyê xwe diguhêre li mejiyê xwe tu carî na”.
 

efrin.net 24.06.2003

Zarokên kurd nijadperestiya destlata Sûriyê rûreş dikin
 

efrin.net, 24.06.2003
Bi boneya Roja Cîhanî ya Zarokan û bi mebesta rûreşkirin û protestokirina siyaseta şoven û kiryarên nijadperest, yên ku gelê kurd li Sûriyê her roj tôşî wan dibe, çar partiyên kurd (Partiya Yekîtî ya Demokart a Kurd, Partiya Yekîtî ya Kurd, Partiya Hevgirtina Gelê Kurd û Partiya Çep a Kurd) sibe (25.06.2003) li katjimêr 11.00 xwepêşandaneke aştiyane li pêş baregeha UNICEF-ê li Şamê li dar dixin. Di xwepêşandanê de dê li rex zarokên kurd nûnerên herçar partiyên navborî jî beşdar bibin.
Xwepêşandêr dê mêmorandumekê (muzekere) li ser rewşa nebaş, ya ku zarokên kurd li Sûriyê bi giştî û yên bê nasname bi taybetî dorpêç dike, pêşkêşî baregeha UNICEF-ê bikin. Herweha ewê daxwaza wekhevî û mafê xwendina bi zimanê dayikê dûrî çewsandina netewî, erebkirin û besîkirinê bikin.
Hêjayî gotinê ye ku destlata şoven ji nuha de li hember vê çalakiyê çavsor bûye û hewil dide ku rê li pêş wê bigre. Di vî warî de – li gorî ku Partiya Hevgirtina Gelê Kurd ragihandî – destlatê rêvebirên ku serperştiya baregeha UNICEF-ê dikin bo Şaxa Filistîn-ê (şaxeke asayêşî li Şamê ye) di heman dem û kata xwepêşandanê de vexwendine, da ku ew mêmoranduma kurdan wernegrin.
Helbet gelê kurd li Kurdistana Sûriyê serûber bi vê xwepêşandanê kêfxweş e. Gelek hevalên partiyên kurd jî ragihandin ku ewê, herçend partiyên wan beşdarî vê çalakiyê nebin jî, beşdar bibin.
Hêvî ew e ku ev çalakî serkeftiyane pêk were û çalakiyên hîn hêjatir û yekîtiya gotara siyasî ya kurd bi xwe re bîne.
 

efrin.net 20.06.2003

Rêxistina Ewropa ya Partiya Yekîtî bi boneya du bîranînên piroz ahengeg li dar xist
 

efrin.net 20.06.2003
Di 15-ê Pûşperê 2003-an de rexistina partiya yekîtî li Ewropa bi boneya bîranîna 46-saliya Tevgera Azadîxwaza Gelê Kurd li Sûriye û bi têperbûna 10 salan di ser damezrandina Partiya Yekitî re ahengeke mezin li Hannoverê (Almaniya) li dar xist. Di vê ahengê de pirtirî 700 heval, nivîskar, rewşenbîr, dostên Yekîtî û Tevgera Kurd ji pir şarên Almaniya û dewletên din, wek Belcîka û Holenda beşdar bûn.
Piştî rawestandina kêlîkeke bêdeng li ser giyana pakrewanên Kurdistanê û xwendina sirûda netewî “Ey Reqîb” endamekî ji Komîta Rêxistina Ewropa gotareke berfereh li ser bizava gelê kurd li Kurdistana Rojava û rola gelê kurd di rizgarkirina Sûriyê ji Firansa diyar kir. Har wisa jî hemî zordestiyên ku li ser Kurdan bûne û hîn jî dibin di ber çavan re derbaz kir û daxwaz ji hikûmeta Sûriyê kir ku ew dîsan li siyaseta xwe vegere û dîroka gelê kurd bi çavên zanistî bixwînin; hebûna nasnama me ya netewî, ziman û çanda me nas bikin. Ewî hîn got: “Mafxwarin û bindestî pirsgirêk in, lê çareserkirin û mafdayîn tenê derman e.”
Dîsan hevalê navborî li ser rewşa rêxistinî ya Tevgera me rawestiya û giringiya “Yekbuyî” û pişt re “Yekîtî”, “Hevbendî”, “Eniya Demokrat a Kurd” û “Kongira Nistîmanî” ya dûhatî di pêşketina Bizava Azadîxwaza Kurd de da xuyakirin û rola “Yekîtî” di pêşxistina weşanên kurdî li Sûriyê û li dervayî welêt û hînkirina zimanê dayîkê diyar kir.
Herweha ewî got: “Lê Tevgera me bi giştî pêwîst e hîn pirtir, bi jîrtir xebatên xwe berdewam bike”. Herweha ewî erkên kurdperwer, hevl, nivîskar û rewsenbiran, bi taybetî li dervayî welêt destnişan kir û ji wan lava kirin ku ew jî li dervayî welêt ji tevgera xwe re bibin balyozên rasteqin.
Li aliyê din jî, hevalê Yekîtiyê helwesta gele kurd li Sûriyê ya erênî li beramberî tevgera azadîxwaza gelê kurd li beşên din (Bakur, Başûr û Rojhilat) ronî kir û serkeftinên Kurdistana Başûr û rizgariya Îraqê ji rêjîma dîktator pîroz kir. Li dawiyê jî ewî azadî ji hemî girtiyên rêzanî li Sûriyê, wek Arif Delîle û pir hevalên wek wî demokratîxwaz û ji hemî girtiyên Kurdan re, wek Îbrahîm Nesan, Hesen Salih, Merwan Osman, Ehmed Qasim û yên mayin xwast.
Piştî wê endamê Komîta Navbendî berpirsiyarê Rêxistina Ewropa nama pîrozbahiyê ya Komîta Rêzanî ya “Yekîtî” xwand û ewî weha got: “Bê goman jidayikbûna yekemîn rêxstina rêzanî ya kurd li Sûriyê ji gelê me re pêdiviyeke dîrokî bû, ta ku ew berevaniya armancên gelê kurd bike, lê dewleta Sûriyê destgirtî nema, bi her awayî hewal da ku rêl û keleman di pêşketina vê partiyê de biçikîne... Tevî tehliya perçebûnên tevgera me ya netewî ya kurdî ji vîna têkoşînê ji bo yekîtiya hêzên kurd berdewam bû, û hîn jî di vê riye de berdewam e. Beriya 10 salan Partiya Yekîtî ya Demokrat a Kurd li Sûriyê hate damezrandin. Partiya me li hember pilan û projeyên wan ên nijadperest û ne mirovane, mina serhejmartina awerte, kembera erebî, û bi dehan dost û havalên partiya me di vê riyê de hatin îşkencekirin, lê baweriya me li cî ye ku tu hêz nikare serê gele me yê kurd û xebatkarên wî yên qehreman bitewîne.” Herweha ewî berdewam kir û peyivî: “Yek ji waneyên sereke ku ji hilweşandina rêjîma Sedamê devbixwîn hate girtin ew e ku divê dewleta Sûriyê doza gelê kurd çareser bike.”
Li dawiyê Komîta Rêzanî di nameya xwe de ahenga navborî pîroz kir û silavên xwe ji xebatkarên xelatgir re dişîne û wan pîroz dike.
Hêjayî gotinê ye ku gelek nameyên pîrozbahiyê ji partî, komele û kesayetiyên ramyarî ji vê ahangê re hati bûn şandin. Ew jî ev bûn:
1. PDK-Sûriyê (Elparti) – Rêxiszina Almaniya
2. Partiya Çep a Kurd li Sûriyê
3. PDK-Îraq – Rêxistina Hannovere
4. Partiya Azadî û Demokrasiyê ya Kurdistanê
5. Partiya Demokrat a Kurd a Sûrî
6. Partiya Hevgirtina Gelê Kurd li Sûriye – Rêxistina Almaniya
7. Komelgeha Kurdên Sûriyê li Berlin û Brandenburg
8. Komîtên Berevaniya Mafên Mirovan li Sûriye (CDF)
9. Rebhan Remedan , endamê komîta Partiya Hevgirtina Gel li Sûriyê.

Rêxistina Ewropa ya Partiya Yekîtî ya Demokrat a Kurd di ve ahengê de gaveke erenî ye baş avêt û pir girtiyên siyasî, yên ku ji bo doza gelê kurd li Sûriyê keti bûn zindanê û niha li dervayî welêt dijîn, bi parola Partiya Yekîtî, bi medaliyên zêrîn, ji aliyê berpirsiyarê rêxistina Ewropa ve hatin xelatkirin. Ew kes jî ev in:
– Dara Heso
– Ebdilsetar Yosif
– Husên Kuro
– Kemal Seydo
– Mihemed Mile Ehmed
– Neşet Betal (Hêmen Kurdaxî)
– Omer Dawod
– Salih Cefer
– Serdar Seid
– Welîd Ehmed Binbaş

Hinekên din jî ji bo xelatkirinê hati bûn vexwendinberçavkirin, lê wan nikari bû ji ber sedemên taybet amede bibûna. Ew kes jî ev bûn:
– Azad Husên
– Cankurd
– Ehmed Îbrahîm
– Hoşeng Sebrî
– Mihemed Omerî

Herweha ji ber dengbej M. Şêxo ve kurê wî Îbrahîm Şêxo hate xelatkirin. Komîta Ewropa xwast ku nirxeke buha bide Şivan Perwer û rola wî ya bala di şiyarkirina hesta neteweyî li her çar perçên Kurdistanê û li dervayî welêt ji bîr ne kir, lewre ew jî wek girtiyên me bi dilşadî hat xelatkirin.
Pişt re mamoste M. M. Ehmed, ji ber van girtiyên jorên de, peyveke siyasê ye hêja xwend.

Di birê duhem de dengbêjên beşdar, wek Evina Welat, Hevraz,
Gulistan Sobari, Eli Sofi, Zoro Seid Yosif û li dawiyê bilbilê Kurdistanê Şivan Perwer bi deng û sazen xwe ahenga me xemilandin û geş kirin. Herweha jî koma Tîrêj ya govendê ya navdar çend awayên semayê ji beşdaran re pêşkêş kirin.
 

efrin.net 15.06.2003

Festivala jinên kurd a yekê
 

efrin.net 15.06.2003
KOMJIN, KOMKAR, IKV-Wuppertal û Hevaltî-Bottrop bi hev re û bi alîkariya Ökofons, Gleichstellungsstelle für Frauernfragen, Gesellschaft für bedrohte Völker, Alte Feuerwache, Bündnis90/Die Grünen KV Wuppertal, IMK Navenda Mafê Kurdan a Navnetewî rojên 20–22.06.2003 li bajarê Wuppertal festivalekê bi navê “Festivala Jinên Kurd a Yekê” amade dikin.

Navnîşan:
Altefeuerwache
Gathe 6
42107 Wuppertal

Roj: 20–22 Hizîranê 2003
Destpêk li katjimêr: 17.30
 

efrin.net 14.06.2003

Herdu hikûmetên Kurdistana Başûr dibin yek
 

efrin.net 14.06.2003
Da ku gelê kurd li Kurdistana Başûr kari be rola xwe di Îraqa paşerojê de hîn xortir bike û da ew bikari be akameke girantir li wê yekê bike ka awayê federalîzmê dê çawa be, roja 12.06.2003-an Polîtbûroyên Partiya Demokrat ya Kurdistanê û Yekîtiya Niştimanî ya Kurdistanê di bin serokatiya kek Mesûd Barzanî û mam Celal Talebanî de li havîngeha Dukanê kom bûn û biryareka nû ya dîrokî ji bo miletê kurd dan. Herdu partiyan biryar dan ku heta du hefteyên di herdu hikûmetên Kurdistanê bikin yek.
Ji bo şopandin, rêdûzkirin û bicihkirina vê biryara pîroz herdu partiyan komîteyeke hevbeş ji şeş kesan ava kirin. Li gor agahdariyan ew şeş kes ev in: Herdu serokwezîr (Nêçîrvan Barzanî û Berhem Salih), herdu serokên Parlamentoyê (Roj Nûrî Şawês û Kemal Fuat) û endamek ji polîtbûroya her partiyekê: Rêzdar Samî Ebdurehman û Fuat Mesûm.
Weke tête zanîn jî, piştî sala 1996-an Yekîtiya Niştîmanî ya Kurdistanê li Silêmaniyê hikûmeteke xweser çê kir û bi vî awayî, mixabin, du desthilatên cida û du serokwezîrên cida li Kurdistanê peyda bûn.
 

efrin.net 12.06.2003

NÛVÎN HERSAN
Ji aliyê asayêşa destlata şoven ve hate girtin
 

N. HERSAN
www.saradistribution.com

efrin.net, 12.06.03
Roja Çarşemê 11.06.2003-an li Qamişlo keça kurd a navdar NÛVÎN HERSAN ji bal asayişa dewleta Sûriyê ve hate binçavkirin.
Bi armanca dîtina diya xwe ya nexweş Nûvîn ji welatê derbederiyê rê girti bû û berê xwe dabû welatê bav û kalan, da ku hesreta dîtina diya wê pê re nemîne. Lê sed mixab in ku dema ew sînor derbas dike asayişa dewletê wê digre û dişîne bajarê Hesîçê. Çiqasî ew ji wan dixwaze ku derfetê bidinê da here diya xwe, berî mirina wê, bibîne û dîsa li wan vegere jî, lê wan guh ne dan xwesteka wê. Demjimêr 8.30 êvarê, berî ku berê wê bidine Şamê, diya wê ya nexweş bi hesreta dîtina keça xwe çavên xwe girtin û koça dawîn kir.
Wekî nas e, Nûvîn Hersan keçeke kurd e zîrek û jêhatî ye. Eve bêtirî 30 salî ye ku ew li Swêdê dijî. Endama Partiya Kar a Sosyalist a Demokrat a Swêdê ya bi nav û deng e. Ew di şarevaniya Stokholmê de nûnera partiya xwe ye. Ew keça Ûsivê Hersan e, ew mirovê ku beriya dora 70 salî berketiyê doz û zimanê kurdî bû û yek ji xwendevan û aboneyên kovara kurdî “HAWAR”-ê bû (niha ew li bajarê Amûdê dijî)
Pirs ew e, ma gelo ta kengî dê karbidestên dewleta Sûriyê bi vî rengî, bi vê gomanê, têkiliyê bi keç û lawên gelê me yê kurd re bikin?! Çima, ji ber ku em kurd in, em di çavên wan karbidestan de gunehkar û tewanbar in?! Ma gelo ew ji riha bavê xwe şerm û fihêt nakin vê ton danûsitandinê bi keçeke kurd e şareza mîna Nûvînê re dikin?! Ma wê çi bû ba ku wan derfet bidanê da ew diya xwe berî mirina wê bibîne û xatiran jê bixwaze?!
Lê xuya ye ku dema xwîna şovenîzmê di serê mirovan de dikele, ew reng mirov nema ber çavên xwe dibînin û nema dizanin bê çi dikin.
Em di efrin.net de vê kiryara şoven rûreş dikin, azadiyê ji çalakvana kurd re daxwazin û bang li hemû Kurdan û hemû mirov- û demokrathezan dikin ku dengê xwe li dijî vê çavsoriya destlata şoven ya Sûriyê bilind bikin.
Hêjayî gotinê ye ku rayedarekî Partiya Yekîtî ya Demokrat a Kurd li Sûriyê ev kar ji raya giştî re da xuyanîkirin, ew riswa û şermezar kir û daxwaza ayadkirina çalakvana kurd kir.
 

efrin.net 11.06.2003

Dewletekê bidin Kurdan
 

efrin.net, 11.06.2003
Profesorê îsraîlî Shlomo Avineri, ku li Unîversîteya Hebrew ya Yerusalemê profesorê zaniyariyên siyasî ye, di rojnameya “Jerusalem Post” de pêr nivîsareke balkêş li ser Îraqê û Kurdan nivîsandi bû. Rêzdar Shlomo Avineri di nivîsara xwe dibêje mirov nikare demokrasiyê derbasî Îraqê bike, çunkî ew tradîsyon li welatên Ereban nîne. Di heman demê de ew balê dikişîne ser wê yekê ku Îraq wekî terîtoryum ne li ser hev e û dibêje ku Başûrê Kurdistanê divêt ji Îraqê bêt veqetandin û Kurd dewleteke serbixwe ava bikin.
Shlomo Avineri dibêje ku yekmayîna axa Îraqê ne bivê-nevê ye, tenê hinek sedemên realpolîtîk yên wekî dijayetiya Tirkiyeyê ya avabûna Kurdistaneke serbixwe hene. Lê belê, dîsan Shlomo Avineri dibêje, piştî şerê li dijî Îraqê rola Tirkiyeyê li ba Emerîkayê weke berê nema. Tirkiye jî dê, weke çawa Îsraîl bivênevê avakirina dewleteke filistînî dipejirîne, avabûna dewleteke kurdî ye serbixwe bipejirîne.
Shlomo Avineri di dawiya nivîsara xwe de dide xuyakirin ku ev yeka (avakirina dewleteke kurdî ye serbixwe) di rajeya erebên Îraqê de ye jî, çunkî, herçendî raya giştî ya ereban li hemberî parçekirina Îraqê derkeve jî, lê di bingehê de avabûna dewleteke kurdî dê rê ji erebên Îraqê re veke ku ew bi xwe di paşerojeke bêzor de bijîn.
Hêjayî gotinê ye ku Shlomo Avineri di salên 70-yî de wekî gerînendeyê giştî li wezareta derve ya Îsraîlê kar kiriye.
 

efrin.net 10.06.2003

11-saliya Encûmena Niştîmanî ya Kurdistanê
 

efrin.net, 10.06.2003
Bi boneya 11-saliya Encûmena Niştîmanî ya Kurdistanê duh li Hewlêra paytext kombûneke taybet hate lidarxistin û tê de, ji bilî serok û berpirsiyarên partiyên kurd û herdu serokwezîran, serok û berpirsiyarên partiyên Ereban û berpirsên leşkerî û siyasî yên emerîkî û birîtanî beşdar bûn.
Serokê Partiya Demokrat ya Kurdistanê Mesûd Barzanî di axaftina xwe de li ser giringiya federalîzmê, destûra nû ya Îraqê û rola pêşmergeyên Kurdistanê rawestiya û got divêt tu kes hêzên pêşmergeyên Kurdistanê wekî mîlîsan nehesibînin ji ber ku pêşmergeyan hertim kurd û erebên li dijî rejîma dîktator ya Sedam Husênî parastine û di paşerojê de jî dê bi awayekî nû bibin hêmaneke sereke yên parastina Îraqê û Kurdistanê.
Kek Mesûd Barzanî nemaze li ser destûra nû ya Îraqê rawestî û diyar kir ku ewê yekîtî yan perçebûna Îraqê moseger bike: Heger ew destûra federaliyeta Kurdan biçespîne û nehêle bi tu awayî bivehî bête ser Kurdistanê, hingê Kurd dê yekîtiyeke azad de digel Ereban bijîn; lê belê heger ew destûr dudiliyê ji Kurdan re çê bike, hingê ne Kurd dibin perçeyek ji Îraqê û ne jî hêzên pêşmergeyên Kurdistanê dibin perçeyek ji ordiya Îraqê ya nû.
Sekreterê giştî yê Yekîtiya Niştimanî ya Kurdistanê Celal Talebanî jî di axaftina xwe de got ku yekîtiya axa Îraqê dê nikari be bêt parastin, eger ev çar tişt nebin: demokrasî, mafê mirovî, parlamentarîzm û federalîzm.
Hêjayî gotinê ye ku berpirsiyarên sivîl û leşkerî yên emerîkî û birîtanî, wekî Bruce Moore, Tim Cross û general David H. Petraeus jî, beşdarî civîna parlamentoyê bû bûn. Herweha Admînîstratorê Îraqê yê emerîkî Paul Bremerî jî mesajek bo Parlamentoya Kurdistanê şandi bû, ya ku tê de goti bû: “Gelek tiştên ku em ji bo pêşeroja Îraqê bi hev re bikin hene. Em bi hev re jî ji avakirina rêveberiyeke îraqî ye nû û destûreke nû bixebitin.” Herweha cîgirê admînîstratorê Îraqê Tim Cross (birîtanî ye) gotinek got, ku tê de pesna ezmûna Kurdistanê da û silavên serokwezîrê Birîtaniya Tonî Blair gihande endamên Encûmena Niştîmanî ya Kurdistanê. Pişt re jî general Petraeus di gotina xwe de pesna rola pêşmergeyên Kurdistanê di azadkirina Îraqê de da.

Weke tête zanîn civîna pêşîn ya Encûmena Niştîmanî ya Kurdistanê di 04.06.1992-an de hati bû lidarxistin. Ji hingê de Encûmenê – weke serokê Encûmenê rêzdar dr. Roj nûrî Şawîş aniye zimên – 472 civîn li dar xistine û 144 biryar di rajeya gelê Kurdistanê de wergirtine.
 

efrin.net 10.06.2003

Salvegera Partiya Demkrat a Kurdistan - Sûriyê li Holenda
 

efrin.net – Holenda
10.06.03
Bi boneya salvegera damezrandina yekem rêxistina siyasî ya kurd li Rojavayê Kurdistanê, herweha bi bona piştgiriyqa televisiyoneke netewî Federasiyona Rêxistinên Kurdên Sûriyê li Holenda û Partiya Demokrat a Pêşverû a Kurd li Sûriyê (rêxistina Holenda) roja 13.06.2003-an ahengekê li dar dixin.
Aheng dê bi dengê hunermendê gewre Şivan Perwer bête xemilandin. Li rex Şivên jî hunermendên me yên hêja (Evîn, Haşim û Zubêr Salih) dê bi dengên xwe yên zîz şahiyê dewlemend bikin.
Hêjayî gotinê ye ku rêxistina Ewropa ya Partiya Yekîtî ya Demokrat a Kurd jî roja 15.06.2003-an li bajarê Hannover (Almaniya) ji bo heman boneyê û bi boneya 10-saliya Partiya Yekîtî şahiyekê digêre.

Agahdariyên Ahenga Holenda
Roj: 13.06.2003
Katjimêr: 17.00
Cih: Cort v/d Lindenstraat 1
Delft / Holland

Ji bo têkilî û agahiyê: (0031) (0)645562552
(0)647664197

efrin.net 09.06.2003

Sûriyê li hember înternêtê tengijiye
 

efrin.net – Efrin
Di çarçewa sînorkirina belavbûna agahiyan de destlata Sûriyê ya “welatparêz û pêşverû” ev sê roj in xelkê Sûriyê ji Hotmail-ê bêpar kiriye. Weke tête zanîn destlata Sûriyê berî vê jî gelek malper û navnîşanên înternêtê qedexe kiri bûn û ew ji ser xelkê Sûriyê birî bûn, filter kiri bû.
Di sedsala 21-ê de, û di demeke weke ya me de, ku tê de gelek pêngavên hêja berve azadî û demokrasiyê têne avêtin, helbet, kirineke ji vî rengî ne tenê kevneperestî û dîktetoriyetî ye, belê ji cîhana hevdem jî dûrketin e. Pir bi dûrketin e.
Ji dêvla ku destlata Sûriyê ji guhertinên herêmê sûdê werbigre û riyê li pêş pêşketin, demokrasî û mafên mirov û gelan dûz û fereh bike, ew bi vê hewildanên xwe yên kufikî hîn dixwaze li pêş guhertinên herî biçûk jî bibe kend û kelem!! Lê helbet, di vê heyama me ya cîhangêriyê de, tu hêz dê nikari be hetava (roja) azadiya hizr û boçûnan, bi alav û bêjingên xwe yên kufikî, veşêre.
 

efrin.net 01.06.2003

Hevbendî, Yekîtî û Hevgirtin hilbijartinan boykot dikin
 

efrin.net 07.06.2003
Piştî ku “hêviyên mayî” jî li ba Tevgera Kurd di qaşo-hilbijartinên perlemana Sûriyê de hatin şikandin û ew gihîşte wê baweriyê ku “gur eyarê xwe navêje” Tevgera Netewî ya Kurd li Sûriyê helwesteke erênî sebaretî hilbijartinên rêvebiriya herêmî girt, ango ew gihîşte wê biryarê ku di hilbijartinên rêvebiriya herêmî de, yên ku di 21.06.2003-an de têne lidarxistin, beşdar nebe û pişta xwe bide wan.
Di vî warî Partiya Yekîtî ya Demokrat a Kurd di civîna fereh a serkirdayetiyê de (dawiya Gulanê 2003) biryar da ku ewê çi bi dengdayînê, çi jî bi namzetiyê “di hilbijartineke weha derewîn de, ku kêmtirîn pileyên rasteqîniyê tê de tune ne, beşdar nebe”.
Herweha Hevbenda Demokrat a Kurd, roja 31.05.2003-an, di daxuyaniyeke xwe de da xuyanîkirin ku wê biryar daye ku ewê “di hilbijartinên bê de ne bi deng, ne jî bi berendamtiyê beşdar nebe, heta ku destlat dest ji kirinên xwe yên dijî yasaya hilbijartinan û bîrdozên demokrat û mafên mirovan bernede” .
Li aliyekî din Partiya Yekîtî ya Kurd jî di daxuyaniyeke xwe de (01.06.2003) bang li gelê kurd kir ku “pişta xwe hem di dengdayînê de, hem jî di berendametiyê de bide van hilbijartinan, ji bo riswakirina vê lîstika sexte û virançî, ya ku bi sextekarî ew bi hilbijartinan binav kirine”.
Hêjayê gotinê ye ku Partiya Hevgirtina Gelê Kurd jî li dawiya Gulanê di daxuyaniyekê de da xuyakirin ku “ji ber nebûna tu guhartineke erênî berve demokrasiyê, tu guhartineke destûrî, yan jî tu guhartineke di yasayên hilbijartinê de, û ji ber berdewamiya rewşê bi giştî weke berê, û da ku em heman şaşiyê weke di xolên borî de dubare nekin, em danezan dikin ku partiya me pişta xwe dide tevaya çalakî û karûbarên hilbijartinên rêvebiriya herêmî yên ku dikin di Hizêranê de bibin”.
Ji bo bêtir agahdariyê, hûn dikarin hemûdaxuyaniyên bi babetê ve girêdayî di beşê erebî de (www.efrin.net/arabi) bixwînin, Çunkî orgînala wan hemû daxuyaniyan – mixabin – bi erebî ne.